کشمیر: عدالتی معاملات میں مداخلت کیخلاف ریلی

مظفرآباد: آزاد کشمیر میں اعلیٰ عدلیہ کے معاملات میں مداخلت کے خلاف اور آئینی اداروں کے تحفظ کیلئے مظفر آباد میں احتجاجی ریلی نکالی گئی۔ ریاستی تشخص بچاوٴ فورم کے زیر اہتمام ریلی کلب ہال مظفرآباد سے نکالی گئی۔ شرکاء نے بینرز اور کتبے اٹھا رکھے تھے جن پر آزاد کشمیر سپریم کورٹ کے چیف جسٹس ریاض اختر چوہدری کے خلاف سپریم کورٹ آف پاکستان میں دائر رٹ پٹیشن کے خلاف نعرے درج تھے۔ شرکاء کا موقف تھا کہ سپریم کورٹ آف پاکستان کو آزاد کشمیر کے آئینی معاملات کی سماعت کا کوئی اختیار نہیں۔ آزاد کشمیر کی اعلیٰ عدلیہ کے ججوں کی تقرری اور سنیارٹی سے متعلق امور کی سماعت سے آزاد کشمیر کی اعلیٰ عدلیہ کا وقار اور ریاستی تشخص مجروع ہو رہا ہے۔شرکاء نے چیف جسٹس آف پاکستان سے زیر سماعت پٹیشن پر سماعت روکنے کی اپیل کی ہے۔