لاہور :آر اے بازار میں زندگی معمول پر

لاہور : آر اے بازار لاہور میں دہشت گردی کے بعد زندگی تیزی سے معمول پر آ رہی ہے۔ شہریوں نے بزدلانہ کارروائیوں کی مذمت کرتے ہوئے دہشت گردوں کے خلاف ڈٹ جانے کے عزم کا اظہار کیا ہے۔لاہور کینٹ کے علاقے آر اے بازار کے اسی مقام پر ہونے والے دو خودکش بمباروں نے تباہی مچا دی تھی جس کے نتیجے میں پورے شہر میں خوف و ہراس پھیل گیا لیکن اس سانحہ کی اگلی صبح تک زندگی معمول پر آ چکی تھی۔ لوگ اپنے کاموں کے لئے جاتے رہے۔ا سکول بھی کھلے رہے۔ والدین کے حوصلے بلند دکھائی دیئے۔ لوگ سارا دن بم دھماکے والا مقام دیکھ کر دہشت گردوں کو کوستے رہے۔ عینی شاہدین کے مطابق جب دھماکا ہوا، اس علاقے میں زندگی کے معمولات جاری تھے، کسی کے وہم و گمان میں بھی نہیں تھا کہ خودکش بمبار یہاں صف ماتم بچھا دے گالیکن لوگ ڈرے نہیں۔ وہ دہشت گردی کے مقابلے کے پرعزم دکھائی دیتے ہیں۔ انہوں نے بم دھماکوں میں شہید ہونے والے وسیم کے جنازے میں شرکت بھی کی اور دہشت گردوں کے خلاف اپنی بلند حوصلگی کا اظہار بھی کیا۔ جائے وقوعہ سے چند میٹر کے فاصلے پر پبلک ٹرانسپورٹ کا بس سٹینڈ واقع ہے۔ جہاں بسیں حسب معمول چلتی رہیں اور حساس ادارے کے ملازمیں ٹریفک کنٹرول کرتے رہے۔ بم دھماکوں سے قیمتی انسانی جانوں کا ضیاع ایک بڑا المیہ ہے لیکن شہریوں کے ناقابل تسخیر حوصلے دہشت گردی کے خاتمے کی نوید سنا رہے ہیں۔