قوم مٹھی بھر دہشتگردوں کے سامنے نہیں جھکے گی ،شہباز

لاہور: وزیراعلیٰ پنجاب شہباز شریف نے کہا ہے کہ قوم مٹھی بھر دہشت گردوں کے سامنے نہیں جھکے گی، اور ان کا ڈٹ کر مقابلہ کیا جائے گا۔ماڈل ٹاوٴن لاہور میں اپنی رہائش گاہ کے باہر صحافیوں سے بات چیت میں وزیراعلیٰ پنجاب شہباز شریف نے کہا کہ عوام نے ماضی میں بھی ایسی صورتحال کا جرات و بہادری سے مقابلہ کیا ہے۔ انہوں نے کہا کہ دہشت گرد ہماری صفوں میں انتشار اور نظام زندگی معطل کرنا چاہتے ہیں۔ انہیں ناکام بنانے کیلئے اتحاد و یکجہتی کی ضرورت ہے۔ وزیراعلیٰ پنجاب نے کہا کہ دہشت گردوں کے دل میں معصوم لوگوں کیلئے کوئی جگہ نہیں۔ صوبے میں امن قائم ہونے تک چین سے نہیں بیٹھیں گے۔ انہوں نے کہا کہ شہری اپنے اردگرد نظر رکھیں اور مشکوک افراد اور اشیاء سے متعلق متعلقہ تھانے کو اطلاع کریں۔ بعد میں وزیراعلیٰ پنجاب شہباز شریف سمن آباد کے علاقے میں پولیس افسر کے گھر کے باہر دھماکے کی اطلاع پر بغیرپروٹوکول کے وہاں پہنچے تو انہیں بتایا گیا کہ یہ دھماکا بھی معمولی نوعیت کا تھا۔