سوات: خودکش حملہ ،تیرہ جاں بحق

سوات: سوات کے شہر مینگورہ میں سیکورٹی چیک پوسٹ کے قریب خودکش حملے میں تیرہ افراد جاں بحق اور باون زخمی ہوگئے۔ شہید ہونے والوں میں تین سیکورٹی اہلکار، ایک اسکاوٴٹ اور دو پولیس اہلکار شامل ہیں۔ خودکش حملہ آور رکشہ سے اتر کر ضلع کچہری میں داخل ہونے کی کوشش کررہا تھا کہ سیکورٹی فورسز کے روکنے پر خود کو دھماکے سے اڑادیا۔ دھماکے میں این جی او کے تین افراد بھی جاں بحق ہوئے۔ اطلاعات کے مطابق اس مقام پر صحافی جمع تھے جو مالم جبہ میں اسکیٹنگ ٹورنامنٹ کی کوریج کے لئے جانے کی تیاری کررہے تھے۔ دھماکے کے بعد علاقے کو سیل اور سیدو شریف مینگورہ روڈ پر کرفیو نافذ کردیا گیا۔ خود کش حملے میں چودہ کلو گرام دھماکا خیز مواد استعمال کیا گیا۔ سوات آپریشن کے کمانڈر میجر جنرل اشفاق ندیم نے زخمیوں کی عیادت کی۔ دھماکے میں زخمی ہونے والے افراد سیدو شریف اسپتال میں زیر علاج ہیں۔ چار شدید زخمیوں کو فوجی ہیلی کاپٹر کے ذریعے پشاور منتقل کریا گیا۔