راولپنڈی: اسی سے زائدافراد گرفتار

راولپنڈی: راولپنڈی کے مختلف علاقوں میں سرچ آپریشن میں اسی سے زائد مشتبہ افراد گرفتار کر لئے گئے، آئی جی اسلام آباد کا کہنا ہے کہ وفاقی دارالحکومت میں بھی سیکورٹی ریڈ الرٹ کر دی گئی ہے۔ ڈی ایس پی سٹی راولپنڈی صابر ندیم نے آج نیوز کو بتایا کہ لاہور دھماکوں کے بعد شہر میں سرچ آپریشن حفاظتی انتظامات کے تحت کیا جا رہا ہے۔ انہوں نے بتایا کہ پولیس نے پیرودھائی ،فوجی کالونی اور ہزارہ کالونی میں کارروائی کر کے اسی سے زائد مشتبہ افراد گرفتار کر لئے ہیں۔ ڈی ایس پی سٹی نے عوام سے اپیل کی کہ پولیس کے ساتھ تعاون کیا جائے۔ دوسری جانب آئی جی اسلام آباد کلیم امام نے آج نیوز کو بتایا کسی بھی ممکنہ دہشت گردی یا تخریب کاری سے بچنے کے لئے شہر بھر میں سیکورٹی ریڈ الرٹ کر کے تمام حساس اور اہم مقامات پر پولیس کی اضافی نفری تعینات کر دی گئی ہے۔ ان کا کہنا تھا کہ ایس ایچ اوز اور ڈی پی اوز کو ہدایت کی گئی ہے کہ وہ دفاتر سے نکل کر اپنے اپنے علاقوں میں پٹرولنگ کریں۔