لاہور: دھماکوں کیخلاف جزوی ہڑتال

لاہور: لاہور میں ہونے والے بم دھماکوں کے خلاف تاجروں نے جزوی ہڑتال کی، بازاروں میں گاہکوں کا رش نہ ہونے کے برابر رہا۔آر اے بازار اور علامہ اقبال ٹاؤن میں ہونے والے دھماکوں کے سوگ میں تاجر تنظیموں کی طرف سے ہفتے کے روز ہڑتال کا اعلان کیا گیا تھا لیکن اس مسئلے پر تاجر برادری تقسیم ہو گئی۔ مال روڈ،ہال روڈ پر مارکیٹیں مکمل طور پر بند رہیں جبکہ شاہ عالم مارکیٹ، انارکلی بازار،برانڈرتھ روڈ سمیت مختلف تجارتی مراکز جزوی طور پر کھلے رہے۔ شہر میں کسی جگہ کوئی مارکیٹ یا کاروباری ادارہ مکمل طور پر بند نہیں رکھا گیا۔ بعض تاجروں کا کہنا تھا کہ ملکی حالات کے باعث پہلے ہی کاروبار نہ ہونے کے برابر ہیں اور ہڑتال سے وہ مزید نقصان برداشت کرنے کے متحمل نہیں ہو سکتے۔