کھوسہ کرپشن کیس ،جسٹس تصدق کاسماعت سے انکار

اسلام آباد: پاکستان بار کونسل کی انضباطی کمیٹی کے سربراہ جسٹس تصدق حسین جیلانی نے لطیف کھوسہ کرپشن کیس کی سماعت سے انکار کر دیا۔ سپریم کورٹ نے لطیف کھوسہ کیس پاکستان بار کونسل کی انضباطی کمیٹی کو ریفر کیا تھا۔ ذرائع کے مطابق اس حوالے سے جب پاکستان بار کونسل نے انضباطی کمیٹی کے سربراہ جسٹس تصدق حسین جیلانی سے رابطہ کیا تو انہوں نے کیس کی سماعت سے انکار کر دیا۔ پاکستان بار کونسل کے صدر ابوالانعام نے آج نیوز کو بتایا کہ جسٹس تصدق جیلانی کے انکار کے بعد چیف جسٹس افتخار محمد چوہدری کو صورتحال سے آگاہ کر دیا گیا ہے۔ ان کا کہنا تھا کہ چیف جسٹس سے درخواست کی گئی ہے کہ اب لطیف کھوسہ کیس کی سماعت کیلئے کسی دوسرے جج کا تقرر کیا جائے۔