اصولی موقف سے پیچھے نہیں ہٹیں گے، قریشی

ملتان: وزیر خارجہ شاہ محمود قریشی نے کہا ہے کہ مذاکرات برائے مذاکرات کے قائل نہیں، نتائج کی امید ہو تو وہ پیدل بھارت جانے کو بھی تیار ہیں۔ بھارت کتنا ہی طاقتور کیوں نہ ہو لیکن کشمیر، پانی ،سیاچن، اور سرکریک کے مسئلے پر اصولی موقف سے پیچھے نہیں ہٹیں گے۔ملتان میں سوئی گیس فراہمی کے منصوبے کی افتتاحی تقریب سے خطاب اور میڈیا سے بات چیت کرتے ہوئے وزیر خارجہ نے کہا کہ پاکستان بھارت کے سامنے نہیں جھکے گا بلکہ آنکھوں میں آنکھیں ڈال کر بات کر رہے ہیں۔ شاہ محمود قریشی نے کہا کہ حامد کرزئی سے ملاقات میں افغان سرزمین پاکستان کے خلاف استعمال ہونے کا معاملہ اٹھایا گیا جس پر انہوں نے یقین دہانی کرائی ہے کہ ایسا نہیں ہونے دیا جائے گا۔شاہ محمود قریشی نے کہا کہ افغانستان دریائے کابل پر کچھ نئے منصوبے بنا رہا ہے اور اس بارے بھی حامد کرزئی سے بات چیت ہوئی تاکہ مستقبل میں پانی کے مسئلے پر کوئی غلط فہمی پیدا نہ ہو۔وزیر خارجہ کا کہنا تھا کہ افغانستان سے تعلقات میں بہتری آئی ہے پاکستان کی کوشش ہے کہ آئندہ پانچ سال میں دونوں ممالک کی تجارت کا حجم پانچ ارب ڈالر تک بڑھایا جائے۔ ایک سوال پر انہوں نے کہا کہ حکومت ڈاکٹر عافیہ صدیقی کی رہائی کے لیے کوششیں کر رہی ہے ڈاکٹر عافیہ کو رہا کرنے سے امریکی ساکھ بہتر ہوگی۔