دہشتگردی کیخلاف متحدہ ہونا پڑے گا،اے این پی

پشاور: عوامی نیشنل پارٹی نے کہا ہے کہ دہشت گردی کے خلاف پوری قوم کو متحد ہونا پڑے گا، دہشت گرد پیار کی زبان نہیں جانتے ،ان کے خلاف کارروائی ہوگی۔ مینگورہ میں خوکش حملے کے بعد آج نیوز سے بات چیت کرتے ہوئے سینیٹر زاہد خان نے کہا کہ کوئی ایک جماعت یا حکومت دہشت گردی کا مقابلہ نہیں کرسکتی۔زاہد خان نے کہا کہ آمروں نے پاکستان کو آگ میں دھکیلا۔ موجودہ صورتحال ضیاء دور کی افغان پالیسی کا نتیجہ ہے، خودکش حملے کرنے والے بے گناہ شہریوں کو نشانہ بنا رہے ہیں۔ پشاور میں میڈیا سے بات کرتے ہوئے میاں افتخار نے کہا کہ دہشت گردوں نے اسلام کے نام پر معصوم لوگوں کو قتل کیا اور تشدد کا نشانہ بنایا۔ انہوں نے کہا کہ پورا ملک دہشت گردی کی لپیٹ میں ہے، جہاں بھی دہشت گرد موجود ہیں ان کے خلاف کارروائی ہوگی۔ اس موقعے پر وزیر مذہبی امور حاجی نمروز نے کہا کہ تمام مسلمانوں کو اسلام دشمن قوتوں کے خلاف متحد ہونا چاہئے۔