سرحد، فاٹا کیلئے مراعاتی پیکیج منظور

اسلام آباد: وزیر اعظم نے صوبہ سرحد اور فاٹا کے لئے نئے مراعاتی پیکیج کی منظوری دے دی ، نئے پیکیج کے تحت ان علاقوں میں ٹیکسوں کی چھوٹ کے علاوہ ڈھائی ارب روپے کے قرضے معاف کئے جائیں گے۔وزارت خزانہ کے مطابق اس نئے پیکیج کے تحت پہلے سے دی گئی مراعات میں اضافہ کر دیا گیا ہے،چھوٹے دکانداروں کے لئے ٹیکس کی حد ایک لاکھ سے تین لاکھ کر دی گئی ہے جبکہ تعلیمی اداروں کو تمام ٹیکسوں سے چھوٹ حاصل ہو گی۔ مراعات کے تحت سیلز ٹیکس میں پچاس فیصد جبکہ فیڈرل ایکسائز ڈیوٹی سے مکمل چھوٹ دی گئی ہے۔ٹیکسوں کی چھوٹ سگریٹ، چینی اور سیمنٹ وغیرہ پر نہیں ہو گی۔ بونیر، سوات، مالاکنڈ اور چترال میں قرضے معاف کر دئیے جائیں گے۔ مئی سے نومبر دو ہزار نو تک مالاکنڈ میں بجلی اور گیس کے تمام بلوں کی چھوٹ دی جا رہی ہے۔چھوٹے تاجروں کو دس ارب روپے کے سستے قرضے مہیا کئے جائیں گے اور ان کا ایک ایوان تجارت بنایا جائے گا۔