سندھ: علماء کے قاتلوں کی عدم گرفتاری کیخلاف ہڑتال

کراچی: مولانا سعید احمد جلال پوری سمیت چار افراد کے قاتلوں کی عدم گرفتاری کے خلاف سندھ بھر میں جزوی ہڑتال رہی۔ سندھ میں ہڑتال کی کال جمعیت علماء اسلام فضل الرحمان گروپ کی جانب سے دی گئی۔ جماعت اسلامی، جے یو آئی اور دیگر مذہبی و سیاسی جماعتوں اور کراچی ٹرانسپورٹ اتحاد نے ہڑتال کی حمایت کا اعلان کیا تھا۔ کراچی کی سڑکوں سے صبح کے وقت پبلک ٹرانسپورٹ غائب رہی جس کے باعث دفاتر اور تعلیمی اداروں میں جانے والوں کو مشکلات کا سامنا کرنا پڑا جبکہ مسافروں کو ریلوے اسٹیشن اور ائیر پورٹ پہنچنے میں بھی شدید پریشانی ہوئی۔ لسبیلہ، پٹیل پاڑہ، بنارس، قائد آباد، لانڈھی مانسہرہ کالونی میں مشتعل افراد نے سڑکوں پر ٹائر جلائے اور ٹریفک معطل کرکے دکانیں بند کرادیں۔ دوسری جانب عالمی تحفظ ختم نبوت کی اپیل پر حیدرآباد میرپور خاص سمیت سندھ کے کئی شہروں میں ہڑتال رہی۔ میرپورخاص شہر کے تمام چھوٹے بڑے کاروباری مراکز مکمل طور پر بند رہے۔ کسی بھی ناخوشگوار واقعے سے نمٹنے کے لئے پولیس کا مختلف علاقوں میں گشت جاری رہا۔