پاک بھارت مذاکرات: مسئلہ کشمیر سرفہرست ہونا چاہئے، فضل

اسلام آباد: پارلیمنٹ کی کشمیر کمیٹی کے چیئرمین مولانا فضل الرحمان نے کہا ہے کہ پاک بھارت مذاکرات میں کشمیر اور پانی کا مسئلہ سرفہرست ہونا چاہئے۔فضل الرحمان نے ایک بیان میں کہا کہ کشمیر کا مسئلہ دو ہزار چار میں شروع ہونے والے جامع مذاکرات کے ایجنڈے کا حصہ تھا لیکن چھ سال میں اس پر کوئی پیشرفت نہ ہو سکی، بھارت مختلف حیلوں بہانوں سے مسئلہ کشمیر سے پہلو تہی کر رہا ہے۔انہوں نے کہا کہ مذاکرات کے ذریعے ہی تنازعات کو حل کیا جا سکتا ہے ۔ فضل الرحمان نے کہا کہ مذاکرات برائے مذاکرات کا کوئی فائدہ نہیں اور بے نتیجہ بات چیت میں وقت ضائع نہیں کرنا چاہئے۔ کشمیر کمیٹی کے چیئرمین نے کہا کہ بھارت سندھ طاس معاہدے کی خلاف ورزی کرتے ہوئے پاکستان کے حصے کا پانی روک رہا ہے،وہ اس طرح کے حربوں سے کشمیر کے معاملے پر پاکستان پر دباوٴ نہیں ڈال سکتا۔ کشمیر کا مسئلہ کشمیری عوام کی خواہشات کے مطابق حل کرنا ہوگا۔