آرمی چیف کا ایئرہیڈکوارٹرز کا دورہ

اسلام آباد: آرمی چیف کا سینئر فوجی افسروں کے ہمراہ ایئر ہیڈ کوارٹرز کا دورہ، پاک فضائیہ کی مشق ہائی مارک دو ہزار دس کے آپریشنل پہلوؤں سے متعلق بریفنگ حاصل کی۔ آئی ایس پی آر کے مطابق چیف آف آرمی سٹاف جنرل اشفاق پرویز کیانی نے سینئر فوجی افسروں کے ہمراہ ایئر ہیڈ کوارٹرز کا دورہ کیا۔ پاک فضائیہ کے سربراہ چیف مارشل راوٴ قمر سلیمان نے ان کا استقبال کیا۔ آرمی چیف اور سینئر فوجی افسران کو پاک فضائیہ کی مشق ہائی مارک دوہزار دس پر تفصیلی بریفنگ دی گئی۔ پاک فضائیہ کی یہ مشق جلد شروع ہو گی اور شمال میں اسکردو سے لے کر جنوب میں بحیرہ عرب تک پورے ملک پر محیط ہوگی۔ اس مشق میں پاک آرمی اور پاک بحریہ کے ساتھ مشترکہ آپریشنز شامل ہوں گے اور اس سے تینوں مسلح افواج کے درمیان یکجہتی اور تعاون میں مزید اضافہ ہو گا۔