متاثرین کنٹرول لائن کا آباد کاری کا مطالبہ

مظفرآباد: وادی نیلم میں کنٹرول لائن پر واقع گاوٴں شالو بٹ سے حجرت کرکے آنے والے کشمیریوں نے حکومت سے دوبارہ آباد کاری کے لئے اقدامات کرنے کا مطالبہ کر دیا۔ متاثرین کنٹرول لائن کے رہنما حاجی جمشید اور عبدالرشید میر نے مظفرآباد پریس کلب میں نیوز کانفرنس کے دوران بتایا کہ پاک فوج نے کشمیر کے آزاد علاقے میں بھارتی فوج کی دراندازیوں کو روکنے کے لئے انکے گاوں میں بڑے پیمانے پر انٹی پرسن مائنز بچھا دی ہیں اور انتالیس خاندانوں کو گاوٴں بدر کر دیا ہے۔ انہوں نے کہا کہ لینڈ مائنز سے متاثر ہونے والوں کے پاس سر چھپانے کے لئے جگہ بھی نہیں۔ انہوں نے حکومت پاکستان اور آرمی چیف جنرل اشفاق پرویز کیانی سے اپیل کی کہ انہیں مہاجر کی حیثیت دے کر مہاجرین جموں و کشمیر کی مراعات دی جائیں۔ انہوں نے دھمکی دی کہ اگر مطالبات تسلیم نہ ہوئے تو سترہ مارچ سے آزاد کشمیر اسمبلی سامنے دھرنا دیا جائے گا۔