حملہ آور چہرے سے قبائلی لگتے ہیں،ثنااللہ

لاہور: پنجاب کے وزیر قانون رانا ثنا اللہ نے کہا ہے کہ لاہور کینٹ میں حملہ کرنے والے دہشت گردوں کی لاشیں مل گئیں،شکل سے قبائلی لگتے ہیں۔ لاہور میں میڈیا سے بات چیت کرتے ہوئے وزیر قانون پنجاب رانا ثنا اللہ نے کہاکہ دونوں حملہ آوروں کے سر مل گئے ہیں۔ دونوں کا تعلق قبائلی علاقے سے دکھائی دیتا ہے۔ رانا ثنا اللہ نے کہا کہ دونوں حملے بارہ بج کر اڑتالیس منٹ پر کئے گئے دونوں حملوں میں پندرہ سے بیس سیکنڈ کا وقفہ تھا۔ حملہ آور پیدل تھے اور انہوں نے جی ایس ایف کی گاڑیوں کو نشانہ بنایا۔ رانا ثنا اللہ نے کہا کہ حملہ آوروں نے خود کش جیکٹس پہنی ہوئی تھیں۔ جن میں دس سے بارہ کلو گرام بارودی مواد تھا۔ رانا ثناء اللہ نے پنجاب میں تین ہزار خود کش حملہ آوروں کی موجودگی کا دعویٰ مسترد کردیا۔ رانا ثناء اللہ کا کہنا تھا کہ دہشت گرد قوم کو شکست نہیں دے سکتے۔ دونوں حملوں میں پاک فوج کے پانچ جوان شہید ہوئے۔