پاک بحریہ کامیزائل اور تارپیڈوکا کامیاب تجربہ

کراچی: پاک بحریہ نے بحیرہ عرب میں میزائل اور تارپیڈو کے کامیاب تجربات کرلئے۔ بحریہ کے سربراہ نے تجربات پر اطمینان کا اظہار کیا ہے۔میزائل اور تارپیڈو تجربات ایف ٹوئنٹی ٹو پی فریگیٹ،پی تھری سی ائیرکرافٹ اور آبدوز آگسٹا نائٹی سے فائر کئے گئے۔ پی تھری سی ائیرکرافٹ سے فائر کئے گئے میزائلوں سے فضا سے زمین پر ہدف کو کامیابی سے نشانہ بنایا گیا۔ آگسٹا نائنٹی بی آبدوز سے فائر کئے گئے زیر آب میزائلوں نے سطح پر ہدف کو کامیابی سے نشانہ بنایا۔ پاک بحریہ کے مطابق تجربات کا مقصد وطن کا دفاع یقینی بنانے کے عزم کا اعادہ کرنا اور مخالف قوتوں کو ڈیٹرنس کا پیغام دینا تھا۔ چیف آف نیول اسٹاف ایڈمرل نعمان بشیر نے تجربات پر اطمینان کا اظہار کرتے ہوئے جوانوں اور افسروں کے جذبے اور پیشہ وارانہ مہارت کو سراہا۔ تجربے سے قبل سمندر میں سینکڑوں میل پر محیط فائرنگ رینج کو تمام ملکی تجارتی جہازوں اور ماہی گیروں کے لئے بند کردیا گیا تھا۔