آئین کے سوا کوئی قانون نہیں چلے گا،چیف جسٹس

کراچی: چیف جسٹس افتخار چوہدری نے کہا ہے کہ عدلیہ آئین پر یقین رکھتی ہے۔ اس کے سوا کوئی قانون نہیں چلے گا۔ کراچی کے وکلا کی قربانیاں فراموش نہیں کی جاسکتیں۔کراچی بار کی تقریب حلف برداری سے خطاب میں چیف جسٹس افتخار محمد چوہدری نے کہا کہ کبھی بدنیتی سے ایسا فیصلہ نہیں کریں گے جو آئین سے متصادم ہو۔ چیف جسٹس نے کہا کہ نچلی سطح پر لوگوں کی مدد کریں جس سے انہیں انصاف کے حصول میں آسانی ہو۔ جسٹس افتخار چوہدری نے کہا کہ عدلیہ کی بحالی کے بعد مشکلات کا سامنا تھا لیکن چیف جسٹس صاحبان، قانونی ماہرین اور وکلا کی مدد سے جوڈیشل پالیسی بنائی گئی۔ جوڈیشل پالیسی سے ساٹھ فیصد اہداف حاصل ہوئے ہیں۔چیف جسٹس افتخار محمد چوہدری نے کہا کہ کراچی کے وکلا کی قربانیوں کو فراموش نہیں کیا جاسکتا۔ بارہ مئی اور نو مارچ کے واقعات میں شہید ہونے والوں کے اہل خانہ عدلیہ سے صرف انصاف کی توقع رکھتے ہیں۔ عدلیہ میں کرپشن کے حوالے سے چیف جسٹس نے کہا کہ وکلا بھی اپنی صفوں میں کرپشن کا خاتمہ کریں۔ کوئی وکیل کرپشن میں ملوث ہے تو بار احتساب کرے۔ اس سے پہلے چیف جسٹس افتخار محمد چوہدری نے کراچی بار کے نو منتخب ارکان سے حلف لیا۔