مولانا جلالپوری قتل، حکومت ذمہ دارقرار

کراچی: جمعیت علما اسلام کراچی کے امیر قاری عثمان نے کہا ہے کہ مولانا سعید احمد جلال پوری کے قتل میں ملوث دہشت گرد کوئی بھی ہو واقعے کی ذمہ دار حکومت ہے۔ جامعہ مسجد بنوری ٹاوٴن کے باہر میڈیا سے گفتگو کرتے ہوئے قاری عثمان نے کہا کہ کراچی میں مذہبی رہنماوٴں پر قاتلانہ حملے اور علما کرام کا قتل ایک سوچی سمجھی سازش کا حصہ ہے۔ دہشت گرد ملک کا امن تباہ کرنا چاہتے ہیں۔ قاری عثمان کا کہنا تھا کہ شہر میں سانحہ نشتر پارک، مفتی جمیل اور مفتی شام زئی کے قتل سمیت متعدد بڑے سانحات کے ذمہ داروں کو گرفتار کر کے سزائیں دی جاتیں تو آج نئے سانحات جنم نہ لیتے۔ قاری عثمان کا کہنا تھا کہ اگر حکومت امن و سکون فراہم نہیں کرسکتی تو علما کرام لائحہ عمل کا اعلان کریں گے۔انہوں نے کارکنان اور طالب علموں سے پرامن رہنے کی اپیل کر تے ہوئے کہا کہ کوئی ایسا کام نہ کریں جس سے کسی کے جان و مال کو نقصان پہنچے۔