لاہور: اقبال ٹاؤن میں چھ دھماکے

لاہور: لاہور کے علاقے علامہ اقبال ٹاؤن اور سمن آباد میں یکے بعد دیگرے معمولی نوعیت کے چھ دھماکوں سے خوف وہراس پھیل گیا، ایک باریش شخص سمیت دو مشکوک افراد کو گرفتار کرلیاگیا۔پہلا دھماکا علامہ اقبال ٹاوٴن کے کشمیر بلاک میں آٹھ بجکر چالیس منٹ پر تھانے کے عقب میں واقع بلڈنگ کلرک سرور کے گھر کے باہر کیاری میں ہوا۔ دھماکے سے قریبی عمارتوں اور گاڑیوں کے شیشے ٹوٹ گئے،شیشے لگنے سے تین افراد زخمی ہوگئے،لوگوں میں خوف وہراس پھیل گیا، دکانیں بند ہوگئیں،آدھے گھنٹے بعداسی علاقے میں پاک فضائیہ کے گروپ کیپٹن انعام الحق کے گھر کے باہر کھڑی کار میں دوسرا دھماکا ہوا، پولیس اور بم ڈسپوزل اسکواڈ کاعملہ اس کا معائنہ کررہا تھاکہ اقبال ٹاؤن کے زینت بلاک میں واقع ایدھی سینٹر کے قریب تیسرادھماکا ہوگیا۔ چوتھا دھماکا ہما بلاک میں اسپتال سے ملحقہ ڈی ایس پی خالد چوہدری کے گھرکے گیراج میں ہوا ہے۔ پانچواں دھماکا اقبال ٹاوٴن کے کریم بلاک میں ٹرانسفارمر پھٹنے سے ہوا،چھٹا دھماکا اقبال ٹاؤن کے کشمیر بلاک میں محمد رفیق اور ریٹائرڈ میجر راؤ ریاست علی کے گھر کے باہر ہوا،جس میں بھی کوئی جانی نقصان نہیں ہوا،دھماکے سے گھروں اور گاڑیوں کے شیشے ٹوٹ گئے،سمن آباد کے علاقے میں ڈی ایس پی چوہدری ریاض کے گھر کے باہر کیاری میں دھماکا ہوا،تاہم کوئی جانی نقصان نہیں ہوا، پولیس نے اقبال ٹاوٴن سے ایک مشکوک شخص اور شادمان کے علاقے سے دوسرے باریش مشکوک شخص کو گرفتار کر لیاہے۔پولیس کے مطابق یہ کریکر کے دھماکے ہیں اور ان میں کسی قسم کے نقصان کی اطلاع نہیں ملی،ان دھماکوں کا مقصد شہریوں میں خوف وہراس پھیلانا تھا۔