لاہور :خودکش دھماکے ،تیس شہدا سپرد خاک

لاہور: آر اے بازار لاہور میں دو خودکش دھماکوں کے تیس شہدا کو سپردخاک کردیا گیا مختلف ہسپتالوں مین زیر علاج سات زخمیوں کی حالت تشویشناک بنائی جاتی ہے جبکہ پولیس نے کینٹ کے علاقے سے چھ مشتبہ افراد کو حراست میں لیا ہے۔لاہور کینٹ کے علاقے آر اے بازار میں ہونے والے دو خودکش حملوں میں آٹھ فوجیوں سمیت ستاون افراد شہید ہوئے تھے،فوجی اہلکاروں سمیت تیس افراد کی نماز جنازہ ادا کردی گئی،ایک فوجی اہلکار محمد عارف کو سمندری میں سپردخاک کردیا گیا نمازجنازہ میں شہریوں کی بڑی تعداد نے شرکت کی۔ کمبائنڈ ملٹری ہسپتال میں زیر علاج زخمیوں کی عیادت کے لئے آج بھی کسی کو اندر جانے کی اجازت نہیں دی گئی۔ حساس ادارے دھماکے میں ملوث افراد کا سراغ لگانے کے لئے تحقیقات کر رہے ہیں۔ ابتدائی تفتیش کے مطابق دونوں خودکش حملہ آور پیدل قریبی بستی سے آئے تھے۔ پولیس نے قریبی بستی میں کریک ڈاؤن کرکے چھ مشتبہ افراد کو حراست میں لیا ہے جن سے تفتیش کی جا رہی ہے۔ پولیس کا کہنا ہے کہ کینٹ میں ہونے والے دہشت گردی کے اس واقعے کی ذمہ داری تحریک طالبان پاکستان کی ایک شاخ نے قبول کر لی۔ دوسری طرف اقبال ٹاؤن میں چھ کریکر پھٹنے سے تین افراد معمولی زخمی ہوئے تھے جنہیں طبی امداد دینے کے بعد فارغ کردیا گیا۔