سوئس مقدمات کاریکارڈ قبضےمیں لینےکا حکم

اسلام آباد: سپریم کورٹ نے سوئس مقدمات کے حوالے سے نیب کی رپورٹ پر عدم اطمینان کا اظہار کر دیا۔ عدالت عظمی نے مقدمات کی بحالی کے لئے سوئس حکام کو فوری خط لکھنے اور نیب کو لندن میں موجود مقدمات کا ریکارڈ قبضے میں لینے کا حکم دے دیا۔عدالت عظمٰی کے تین رکنی بنچ نے جسٹس جاوید اقبال کی سربراہی میں بنکرز سٹی کیس کی سماعت کی۔ سماعت کے آغاز میں عدالت نے قائم مقام چیئرمین نیب عرفان ندیم کو فوری طور پر ریکارڈ پیش کرنے کا حکم دیا۔ جسٹس جاوید اقبال نے کہا کہ اگر کسی کو آئینی استثنیٰ حاصل ہے تو عدالت کو تحریری طور پر آگاہ کیا جائے۔ انھوں نے کہا کہ این آر او کا فیصلہ خصوصی طور پر کسی شخص کے خلاف نہیں۔ اتنا عرصہ گزرنے کے بعد بھی عدالت کے فیصلے پر عمل درآمد کیوں نہیں کیا گیا۔ حکومت کے پاس سپریم کورٹ کے فیصلے پر عمل درآمد کے علاوہ کوئی راستہ نہیں ہے۔ کرپشن میں ملوث افراد کا ریکارڈ ضائع کیا گیا۔ انھوں نے نیب کو سوئس عدالتوں میں مقدمات دوبارہ کھولنے کیلئے فوری خط لکھنے اور لندن میں سوئس مقدمات کا ریکارڈ قبضے لینے کا حکم دیا۔ جسٹس جاوید اقبال نے کہا کہ مشاہدے میں آیا ہے کہ پراسیکیوٹر جنرل نیب مقدمات کی پیروی میں دلچسپی نہیں لے رہے۔ عدالت کو بھرتی کئے گئے تمام پراسیکیوٹر جنرلز کا ریکارڈ بھی پیش کیا جائے۔ قائم مقام چیئرمین نیب نے عدالت کو یقین دہانی کرائی کہ سپریم کورٹ کے فیصلوں کی مکمل تعمیل کی جائے گی۔ سماعت چوبیس مارچ کو دوبارہ ہوگی۔