مولانا سعید جلال پوری سپرد خاک

کراچی: کراچی میں فائرنگ سے جاں بحق ہونے والے عالم دین سعید جلال پوری سمیت چار افراد کو ہزاروں سوگواروں کی موجودگی میں سپرد خاک کردیا گیا۔ مجلس تحفظ ختم نبوت کراچی کے امیر مولانا سعید جلال پوری ، ان کے صاحبزادے عمر حذیفہ جلال پوری ، داماد فخر الزماں اور ڈرائیور عبدالرحمٰن کی اجتماعی نماز جنازہ جامعہ علوم اسلامیہ بنوری ٹاؤن میں بعد نماز جمعہ ادا کی گئی۔ اس موقع پر سیکورٹی کے انتہائی سخت انتظامات کئے گئے تھے۔ مسجد کی طرف آنے والے تمام راستے ٹینکر اور ٹرک کھڑے کرکے بند کردیئے گئے اور پولیس کی بھاری نفری تعینات تھی۔ جنازے میں امیر جماعت اسلامی کراچی محمد حسین محنتی ، سابق ارکان قومی و سندھ اسمبلی لئیق خان، مولانا عمر صادق ، نصر اللہ شجیع، جمعیت علمائے اتحاد پاکستان کے مولانا ضمیر اختر منصوری سمیت مختلف سیاسی و مذہبی جماعتوں کے رہنماؤں ، علمائے کرام اور ہزاروں افراد نے شرکت کی۔ جامعہ کے مہتمم اعلیٰ مولانا ڈاکٹر عبدالرزاق سکندر نے نماز جنازہ پڑھائی۔ علمائے کرام نے شرکاء سے پرامن رہنے کی اپیل کی۔ جنازے کے بعد میتیں مسجد سے باہر لائی گئیں تو شرکاء نے اللہ اکبر کے نعرے بلند کئے۔ میتیں ان کی آخری آرام گاہ کی طرف روانہ کرنے کے بعد شرکاء پرامن طور پر منتشر ہوگئے۔ چاروں شہداء کو ابو الحسن اصفہانی روڈ اسکاؤٹ کالونی میں واقع جامع مسجد خاتم النبین کے احاطے میں سپرد خاک کردیا گیا۔