سندھ طاس کی خلاف ورزی، بھارت کیخلاف مہم کااعلان

لاہور: صنعتکاروں کی تنظیم پاکستان واٹر فرنٹ نے بھارت کی طرف سے پاکستانی دریاؤں کاپانی روکنے کے خلاف ملکی اور بین الاقوامی سطح پر مہم چلانے کا اعلان کر دیا ہے۔لاہور ایوان صنعت و تجارت میں میڈیا کو بریفنگ دیتے ہوئے واٹر فرنٹ کے سربراہ شہزاد علی ملک نے کہا کہ بھارت چناب، جہلم اور دریائے سندھ پر نئے ڈیم اور بجلی گھر تعمیر کرکے معاہدہ سندھ طاس کی خلاف ورزیوں کا نیا سلسلہ شروع کرنے والا ہے۔ان حالات میں سفارتی سطح پر بین الاقوامی مہم چلانے کے لئے ملک بھر کے ایوانہائے صنعت و تجارت کو ایک پلیٹ فارم پر جمع کیا جائے گا۔ لاہور چیمبر کے صدر ظفر چوہدری نے کہا کہ اب سندھ طاس معاہدے کا از سر نو جائزہ لینے کا وقت آگیا ہے،بھارت کے دریائے جہلم پر تین سو تیس میگاواٹ کے کشن گنگا منصوبے کے خلاف عالمی بنک سے فوری رجوع کیا جانا چاہیے۔اس موقع پر کاشت کار رہنما ایوب میو نے اعلان کیا کہ بھارتی منصوبوں کے خلاف اکیس مارچ کو واہگہ بارڈر پر احتجاج کیا جائے گا۔