گردے کی بیماری سے متعلق شعور کا دن

کراچی: دنیا بھر میں گردے کی بیماری کے بارے میں شعور و آگاہی کا دن جمعرات کو منایا گیا۔ طبی ماہرین کا کہنا ہے کہ ذیابیطس کے مریضوں میں گردے کی بیماری کا امکان چالیس فیصد بڑھ جاتا ہے۔ گردوں کے مریضوں کی تعداد میں مسلسل اضافے کے باعث دو ہزار چھ سے ہر گیارہ مارچ کو ورلڈ کڈنی ڈے منایا جارہا ہے۔ اس سال ورلڈ کڈنی ڈے کا عنوان انسانی جسم میں شوگر لیول کنٹرول رکھنا ہے۔ دنیا بھر میں ذیابیطس کے مریضوں کی تعداد اٹھائیس کروڑ ہے، نوے لاکھ کا تعلق پاکستان سے ہے۔ ایک اندازے کے مطابق دو ہزار پچیس تک شوگر کے مریضوں کی تعداد بڑھ کر اڑتیس کروڑ ہوجائے گی۔ اس کے ساتھ ہی گردوں کی بیماری میں مبتلا مریضوں کی تعداد میں بھی اضافہ ہوگا۔ طبی ماہرین کہتے ہیں جسم میں شوگر لیول اور بلڈ پریشر کا کنٹرول نہ ہونا گردوں کی بیماری کی بڑی وجہ ہے۔طبی ماہرین کے مطابق انسانی جسم کو روزانہ دس سے بارہ گلاس پانی کی ضرورت ہوتی ہے ، کم مقدار میں پانی کا استعمال گردوں کے مریضوں کی تعداد میں اضافے کی بڑی وجہ ہے۔طبی ماہرین کا کہنا ہے کہ ذیابیطس اور گردے کی بیماری سے بچنے کیلئے روغنی کھانوں اور جنک فوڈ ز سے دور رہا جائے۔