کراچی: ایئرپورٹ, دھماکاخیزمواد برآمد

کراچی: کراچی ایئرپورٹ پر دبئی جانے والے مسافر سے دھماکا خیز مواد اور تین کارتوس برآمد ہوئے ہیں، ایئرپورٹ سیکورٹی فورس نے ملزم کو گرفتار کرلیا۔اے ایس ایف کے مطابق محمد عابد وزیر نامی مسافر نجی ایئرلائنز کے ذریعے دبئی جانے کیلئے کراچی ایئرپورٹ پہنچا، تلاشی کے دوران اس کے سامان سے آدھا کلوگرام دھماکا خیز مواد اور تین کارتوس برآمد ہوئے جس پر اسے حراست میں لے کر پوچھ گچھ شروع کردی گئی ہے۔ملزم عابد وزیر کا تعلق راجن پور سے ہے۔ دھماکا خیز مواد کی برآمدگی کے بعد ایئرپورٹ کی سیکورٹی سخت کردی گئی ہے۔ ایئرپورٹ ذرائع کے مطابق ایئرپورٹ کی اسکیننگ مشین خراب ہے، اگر اے ایس ایف کا عملہ مناسب چیکنگ نہ کرتا تو ملزم دھماکا خیز مواد جہاز پر لے جانے میں کامیاب ہوسکتا تھا۔ دھماکا خیز مواد ملنے کے بعد جہاز کے مسافروں کا سامان اتار کر دوبارہ تلاشی لی گئی جس کے بعد جہاز تین گھنٹے تاخیر سے رات بارہ بجکر چالیس منٹ پر دبئی روانہ ہوا۔