فضل اللہ سوات میں نہیں، کورکمانڈر سرحد

سوات: کورکمانڈر سرحد مسعود اسلم نے کہا ہے کہ فضل اللہ سوات میں موجود نہیں وہ جہاں کہیں بھی ہوگا اس کا تعاقب کیا جائے گا۔ کورکمانڈر سوات نے میجر جنرل اشفاق ندیم کے ہمراہ سوات کا دورہ کیا۔ انہوں نے شہداء پارک، پبلک لائبریری اور یتیم خانے کا افتتاح کیا۔ میڈیا سے بات چیت میں کورکمانڈر سرحد نے کہا کہ فضل اللہ سوات میں نہیں ہے، وہ جہاں کہیں بھی ہوگا اس کا تعاقب کیا جائے گا۔ انہوں نے کہا کہ سیکورٹی فورسز کے زیر حراست مسلم خان، محمود خان اور دیگر دہشت گردوں سے تفتیش مکمل ہوچکی ہے۔ ان دہشت گردوں کو انسداد دہشت گردی کی خصوصی عدالتوں میں پیش کیا جائے گا۔ کورکمانڈر نے کہا کہ سوات میں مستقل امن تک فوج موجود رہے گی۔ کورکمانڈر سرحد کے دورہ سوات کے موقعے پر سیدو مینگورہ روڈ پر کرفیو نافذ کیا گیا تھا جس کی وجہ سے سرکاری دفاتر اور اسکول بند رہے۔