ضمنی انتخاب میں متعدد بے ضابطگیاں ہوئیں، آفتاب

لاہور: پیپلزپارٹی پنجاب کے صدر رانا آفتاب احمد نے کہا ہے کہ جھنگ کے ضمنی انتخابات میں صوبائی وزراء کی مداخلت سمیت متعدد بے ضابطگیاں ہوئی ہیں، رپورٹ تیار کرکے مرکزی قیادت کو آگاہ کریں گے۔ لاہور میں میڈیا سے گفتگو کرتے ہوئے انہوں نے کہا کہ ضمنی الیکشن میں حکومت پنجاب کا دوہرا معیار سامنے آیا ہے، پیپلزپارٹی کے وفاقی وزراء سے جھنگ میں اسکواڈ واپس لے لئے گئے جبکہ مسلم لیگ ن کے وزیر قانون سمیت صوبائی وزراء کو سرکاری مشینری کے ساتھ حلقے میں گھومنے کی اجازت دی گئی۔ رانا آفتاب احمد نے کہا کہ سپریم کورٹ سے نااہل قرار پانے والے امیدوار کو مسلم لیگ ن نے ٹکٹ دے دیا، وہ دوبارہ آرٹیکل باسٹھ اور تریسٹھ کے تحت نااہل ہو جائے گا۔ رانا آفتاب احمد کا کہنا تھا کہ پنجاب حکومت سے متعلق ان کے تحفظات برقرار ہیں، پیپلزپارٹی کے کارکنوں کو تھانے کچہری سمیت ہر جگہ مشکلات کا سامنا ہے ،وہ اس سلسلے میں وزیراعظم کو آگاہ کریں گے۔