کالعدم تنظیمیں دوبارہ متحرک ہورہی ہیں، رحمان

لاہور: وفاقی وزیر داخلہ رحمان ملک نے کہا ہے کہ کالعدم تنظیمیں دوبارہ متحرک ہو رہی ہیں، کام بند نہ کیا تو سخت کارروائی کی جائے گی۔ لاہور میں جشن بہاراں کے سلسلے میں ہارس اینڈ کیٹل شو کے موقع پر میڈیا سے بات چیت کرتے ہوئے رحمان ملک کا کہنا تھا کہ کالعدم تنظیموں کو دوبارہ سر نہیں اٹھانے دیا جائے گا۔ انہوں نے بتایا کہ تحریک طالبان کے ایک گروہ نے لاہور دھماکے کی ذمہ داری قبول کرلی ہے۔ گورنر پنجاب اور وزیر قانون کی بیان بازی کے حوالے سے انہوں نے کہا کہ سیاست میں ایسا ہوتا رہتا ہے، تاہم حدود کا خیال رکھنا چاہئے۔ جہلم سے اغواء ہونے والے بچے کے بارے میں وزیر داخلہ نے کہا کہ وہ مغوی کے والدین سے رابطے میں ہیں اور اس کی بازیابی کے لئے کوششیں جاری ہیں۔ انہوں نے بتایا کہ بچے کے والد منع کرنے کے باوجود برطانیہ چلے گئے ہیں۔ رحمان ملک نے کہا کہ کلچرل شو ہماری ثقافت کی عکاسی کرتے ہیں اور دہشت گردی کے باوجود ایسی سرگرمیاں بہادر قوموں کی نشانی ہیں۔