سوئس مقدمات کے حوالے سے رپورٹ جمع

اسلام آباد: نیب کے قائم مقام چیئرمین عرفان ندیم نے صدر زرداری کے خلاف سوئس مقدمات دوبارہ کھولنے کے حوالے سے رپورٹ سپریم کورٹ میں جمع کرا دی ہے۔ ڈپٹی پراسیکیوٹر جنرل راجہ امیر عباس اور ڈاکٹر اصغر رانا نے سپریم کورٹ میں رپورٹ جمع کرائی جس میں قائم مقام چیئرمین کا حلفیہ بیان بھی شامل ہے۔ رپورٹ میں بتایا گیا ہے کہ صدر آصف علی زرداری کے خلاف سوئس عدالت میں مقدمات دوبارہ کھولنے کے لئے نیب نے وزارت قانون سے رہنمائی مانگی تھی لیکن کوئی جواب موصول نہیں ہوا۔پانچ مارچ کو اٹارنی جنرل منصور خان کو دوبارہ یاد دہانی بھی کرائی گئی۔ رپورٹ میں مزید بتایا گیا ہے کہ نیب کے پراسیکیوٹر جنرل دانشور ملک کو عدالتی حکم کے مطابق برطرف کرنے کے لیے حکومت کو سمری بھیج دی گئی تھی۔ وزارت قانون نے اٹارنی جنرل کی سربراہی میں انکوائری کمیٹی تشکیل دے دی ہے جس نے دانشور ملک کو اٹھارہ مارچ کو طلب کرلیا ہے۔ کیس کی سماعت جمعہ کو جسٹس جاوید اقبال کی سربراہی میں سپریم کورٹ کا تین رکنی بینچ کرے گا۔