وسائل پرصوبوں کو بھی حق ملکیت دینے پراتفاق

اسلاآباد: پارلیمانی کمیٹی برائے آئینی اصلاحات نے قدرتی وسائل پر وفاق کے ساتھ صوبوں کو بھی حق ملکیت دینے پر اتفاق کرلیا۔رضا ربانی کی زیر صدارت کمیٹی کے اجلاس میں آرٹیکل ایک سو باہتر کی ذیلی شق دو میں تبدیلی پر اتفاق کیا گیا ہے جس کے تحت آئندہ قدرتی وسائل پر وفاق کے ساتھ صوبوں کا بھی حق ملکیت ہو گا اورمستقبل کے معاہدوں میں اس کا اطلاق ہو گا جبکہ موجودہ معاہدے برقرار رہیں گے۔ کمیٹی نے آرٹیکل ایک سو باہتر میں ایک اور ذیلی شق بھی شامل کرنے پر اتفاق کیا جس کے تحت بارہ ناٹیکل میل تک سمندری حدود میں وفاق کے ساتھ صوبوں کی مشترکہ ملکیت ہوگی تاہم بارہ سے دو سو ناٹیکل میل تک ملکیت وفاق کے پاس ہوگی، آرٹیکل ایک سو ستاون میں بھی ترمیم پر اتفاق کیا گیا ہے جس کے مطابق وفاق صوبوں میں بجلی پیدا کرنے کے منصوبے، متعلقہ صوبے کی رضامندی سے لگائے گا۔