پاکستانی طالبعلموں کی امتیازی پوزیشنز

راولپنڈی: ایک طرف پاکستان میں کرکٹ اور ہاکی کا برا حال ہے قومی ہیرو سمجھے جانے والے کھلاڑی ہرطرف بدنامی کا باعث بن رہے ہیں دوسری طرف پاکستان کے دو ہونہار طالبعلموں نے اے اور او لیول میں امتیازی پوزیشنز حاصل کر کے نہ صرف دنیا بھر میں ملک کا نام روشن کیا ہے۔ بلکہ یہ ثابت بھی کردیا ہے کہ قومی ہیرو کہلانے کے مستحق وہی ہیں۔راولپنڈی کے دو نوجوانوں صائم اور اسد فاروقی نے اے اور او لیول میں نمایاں کامیابی حاصل کی ہے۔ صائم نے اے لیول کے شعبہ عمرانیات میں مضمون نویسی کے مقابلہ میں دنیا بھر میں اول پوزیشن حاصل کی۔صائم کا کہنا ہے کہ ان کے لئے زیادہ خوشی اس بات کی ہے کہ ملک کے لیے اتنا بڑا اعزاز حاصل کرنا ان کے حصے میں آیا۔ریجن بھر میں او لیول میں ٹاپ کرنے والے اسد فاروقی بھی صائم جیسے ہی جذبات رکھتے ہیں۔ اسد کا کہنا ہے کہ وہ پڑھائی کے ساتھ ساتھ کھیل کود کو بھی مناسب وقت دیتا ہے۔ اگر پاکستانی نوجوانوں کو مواقع ملیں تو دنیا بھر میں ملک کا نام روشن کر سکتے ہیں۔ صائم اور اسد کی کامیابی پر ان کے اساتذہ بھی بہت خوش ہیں۔ ان کا کہنا ہے کہ دنیا بھر میں ملک کا نام روشن کرنا صائم اور اسد کے لیے کسی اعزاز سے کم نہیں۔صائم اور اسد نے اس عزم کا اظہار کیا کہ وہ مستقبل میں بھی محنت کو اپنا شعار بنا کرملک و قوم کی خدمت جاری رکھیں گے۔