آئینی اصلاحات:اختلافات دور کرنے کیلئے کمیٹی قائم

اسلام آباد: آئینی اصلاحات کمیٹی میں اراضیات، قدرتی اور معدنی وسائل سے متعلق آئین کے آرٹیکل ایک سوباہترکی ذیلی شق دو پر اختلافات شدید ہو گئے، جنہیں دور کرنے کے لئے مشاورتی کمیٹی قائم کر دی گئی۔رضا ربانی کی زیر صدارت پارلیمانی کمیٹی کے اجلاس میں آئین کے آرٹیکل ایک سو باہتر کی ذیلی شق دو کا جائزہ لیا گیا، اس کے تحت اراضیات، معدنیات اور دوسری قیمتی اشیا جو پاکستان کی سمندری حدود میں سمندر کے نیچے ہوں، وفاقی حکومت کی ملکیت ہوں گی۔ اس شق پر قوم پرست جماعتوں نے سخت موقف اختیارکرتے ہوئے مطالبہ ہے کہ ان اشیا پر حق ملکیت متعلقہ صوبائی حکومتوں کا ہونا چاہیے اور صوبائی خود مختاری کے لئے یہ اقدام ناگزیر ہے جبکہ بڑی جماعتوں نے ان کے موقف کی مخالفت کی اور کہا کہ ان وسائل سے ہونے والی آمدنی میں صوبوں کا حصہ بڑھایا جا سکتا ہے لیکن حق ملکیت نہیں دیا جا سکتا۔ اختلافات دور کرنے کیلئے رضا ربانی، اسراراللہ زہری، شاہد بگٹی، ڈاکٹرعبدالمالک، فاروق ستار، اسحاق ڈار، وسیم سجاد اور افراسیاب خٹک پر مشتمل مشاورتی کمیٹی قائم کر دی گئی، جو اپنی سفارشات پارلیمانی کمیٹی کو دے گی۔