بلوچستان پولنگ: فائرنگ سے اکیس زخمی

جعفرآباد: جعفرآباد میں بلوچستان اسمبلی کی نشست پچیس پر ضمنی انتخاب کیلئے پولنگ کے دوران فائرنگ کے واقعات میں اکیس افراد زخمی ہوئے۔ میر عطااللہ بلیدی سمیت بارہ آزاد امیدواروں نے دھاندلی کے الزامات لگاتے ہوئے ضمنی انتخاب کے بائیکاٹ کا اعلان کیا۔ تحصیل اوستہ محمد کے علاقے نورپور میں پولنگ ایجنٹوں میں ہاتھا پائی کے بعد فائرنگ سے چودہ افراد زخمی ہوگئے، اس کے بعد عملہ پولنگ اسٹیشن چھوڑ کر بھاگ گیا اور اس پولنگ اسٹیشن پر پولنگ روک دی گئی۔ نوشکی جبین میں بھی پولنگ اسٹیشن پر فائرنگ کے بعد پولنگ روکی گئی۔ اس سے پہلے گوٹھ جمعہ پولنگ اسٹیشن پر فائرنگ سے چار افراد زخمی ہوئے۔ یعقو مالا میں بوائز پرائمری اسکول میں قائم پولنگ اسٹیشن میں دو گروہوں کے درمیان تصادم کے نتیجے میں تین افراد زخمی ہوئے۔ پی بی پچیس میں ضمنی انتخاب کے دوران دھاندلی کے الزمات بھی لگائے جاتے رہے۔ آزاد امیدوار عطا اللہ بلیدی کا کہنا تھا کہ ان کے ڈیڑھ سو سے زائد پولنگ ایجنٹ اغواء کئے گئے۔ انہوں نے ریٹرننگ افسر، ڈی سی او اور ڈی پی او کو اس بارے میں آگاہ کیا لیکن کوئی نوٹس نہیں لیا گیا۔ آزاد امیدوار مائی جوری نے شکوہ کیا کہ حکومت نے پولنگ والے دن بھی انہیں سیکورٹی نہیں دی۔ اٹھارہ فروری دو ہزار آٹھ کے عام انتخابات میں پی بی پچیس سے آزاد امیدوار رستم خان جمالی کامیاب ہوئے تھے، پاکستان پیپلز پارٹی کے میر عطاء اللہ خان بلیدی دوسرے نمبر پر رہے تھے۔ وزیر ایکسائز رستم خان جمالی کو اگست دو ہزار نو میں کراچی میں قتل کردیا گیا تھا جس کے بعد یہ نشست خالی تھی۔