سینٹ: اسکینرز خریدنے پراظہار برہمی

اسلام آباد: سینٹ کی قائمہ کمیٹی برائے داخلہ کا بغیر ٹینڈر نیو ٹیک کمپنی سے اسکینرز خریدنے پر اظہار برہمی، کمیٹی نے اسکینرز کی خریداری کے معاہدے، ٹینڈر کے قواعد اور ان اسکینرز کے انسانی صحت پر اثرات کی تفصیلات طلب کر لیں۔سینیٹر طلحہ محمود کی زیر صدارت قائمہ کمیٹی کے اجلاس میں بتایا گیا کہ چین سے منگوائے گئے اسکینرز ایک گھنٹے میں صرف چالیس گاڑیاں اسکین کرنے کی صلاحیت رکھتے ہیں اور ان سے صرف مشتبہ گاڑیوں کو اسکین کیا جا سکے گا۔ ان اسکینرز کے ذریعے چھوٹی گاڑیوں کو اسکین کرنے کے لئے انہیں زمین سے بلند کرنا پڑے گا۔ اجلاس کے بعد سینیٹر طلحہ محمود نے نیوز بریفنگ میں بتایا کہ کثیر لاگت سے خریدے گئے چار اسکینرز پر کمیٹی کے تحفظات ہیں، کمیٹی نے ایک ہفتے میں اسکینرز خریدنے کے معاہدے، ٹینڈر کے قواعد اور ان اسکینرز کے انسانی صحت پر اثرات کے حوالے سے رپورٹ طلب کر لی ہے۔ طلحہ محمود کا کہنا تھا کہ کمیٹی نے امریکا اور یورپی ممالک کے ہوائی اڈوں پر کی جانے والی اسکیننگ کو بے عزتی اور پاکستان کی ثقافت کے خلاف قرار دیا ہے۔ کمیٹی فاٹا اراکین پارلیمنٹ کی جانب سے دورہ امریکا منسوخ کرنے کے فیصلے کی حمایت کرتی ہے۔امریکی ہوائی اڈوں پر پاکستانیوں کی اسکیننگ کا سلسلہ ختم ہونا چاہیے۔ انہوں نے بتایا کہ غیر قانونی موبائل سموں کے حوالے سے جلد اجلاس بلایا جا رہا ہے۔ کمیٹی اسلام آباد انتظامیہ کی جانب سے اہم شاہراہیں بلاک کرنے کا بھی نوٹس لیا ہے۔