مقبوضہ کشمیر:سرکاری ملازمین کی ہڑتال

سری نگر: مقبوضہ کشمیر میں سرکاری ملازمین کی کام چھوڑ ہڑتال کا آج دوسرا دن ہے۔ ہڑتال کے باعث سرکاری تعلیمی اداروں اور دفاتر میں سرگرمیاں ٹھپ ہو کر رہ گئیں۔مقبوضہ کشمیر کے ساڑھے چھ لاکھ سرکاری ملازمین اپنے مطالبات منوانے کے لئے پانچ روزہ ہڑتال پر ہیں۔ ملازمین کی انجمن ایمپلائز جوائنٹ ایکشن کمیٹی کے ترجمان فاروق ترالی کا کہنا ہے کہ اگر پانچ روزہ ہڑتال کے باوجود حکومت نے مطالبات تسلیم نہ کئے تو غیر معینہ مدت تک ہڑتال کی جائے گی۔ فاروق ترالی کے مطابق حکومت کو تین سال میں قسطوں میں ملازمین کے بقایا جات ادا کرنے کی تجویز دی ہے۔ دوسری جانب مقبوضہ وادی کے وزیر خزانہ کا کہنا ہے کہ ریاست کو مالی مشکلات کا سامنا ہے، ملازمین کے بقایا جات کی ادائیگی کے لئے رقم نہیں ہے حکومت نے ملازمین کو چند تجاویز دی ہیں لیکن وہ ان پر غور کرنے کے بجائے ہڑتال کررہے ہیں۔ سرکاری ذرائع کے مطابق اگر ملازمین نے ہڑتال جاری رکھی تو حکومت ان کے خلاف کارروائی کرسکتی ہے جبکہ فاروق ترالی کا کہنا ہے کہ وہ کوئی بھی سزا بھگتنے کے لئے تیار ہیں۔