مانسہرہ: دھماکا،پانچ افرادجاں بحق

مانسہرہ: مانسہرہ میں این جی او کے دفتر پردہشت گردوں کے حملے میں دو خواتین سمیت پانچ افراد جاں بحق اور پانچ زخمی ہوگئے۔ واقعے کے بعد ملک بھر میں ورلڈ وژن کے دفاتر بند کردیئے گئے ہیں۔پولیس کے مطابق تحصیل اوگی میں دہشت گردوں نے غیرملکی این جی او ورلڈ وژن کے دفتر پر بم سے حملہ کیا اور فائرنگ بھی کی۔ بم دھماکے سے عمارت منہدم ہوگئی۔ حملے میں کہکشاں ، انجینئر ایاز، لیاقت، جمشید اورزریاب جاں بحق ہوئے۔ زریاب اور لیاقت کا تعلق مانسہرہ اور کہکشاں کا تعلق ایبٹ آباد سے تھا۔ جمشید پشاور اور ایاز سوات کے رہائشی تھے۔ دھماکے کے بعد ملک بھر میں قائم ورلڈ وژن کے چھ دفاتر غیرمعینہ مدت کے لئے بند کردیئے گئے ہیں۔ یہ این جی او زلزلے سے متاثر افراد کی بحالی اور نقل مکانی کرنے والوں کی معاونت کے لئے کام کر رہی تھی۔ مانسہرہ میں دو ہزار آٹھ میں بھی غیر ملکی این جی او پلان انٹرنیشنل پر حملہ کیا گیا تھا جس میں چار افراد ہلاک اور نو زخمی ہوگئے تھے۔