چناب پر بھارتی منصوبے دفاع پاکستان کیلئے خطرہ قرار

لاہور: پاکستانی کمشنر سندھ طاس سید جماعت علی شاہ نے خبردار کیا ہے کہ دریائے چناب پر بھارت کے نئے منصوبے دفاع پاکستان کے لئے خطرہ ہیں،منگلا ڈیم کو جلد از جلد مرالہ بیراج سے لنک کر لیا جائے۔ لاہور میں ایک سیمینار سے خطاب کرتے ہوئے سید جماعت علی شاہ نے کہا کہ بھارت دریائے چناب پر بگلیہار ڈیم بنا کر قلت کے دنوں میں پاکستان کا پانی روک چکا ہے۔ ان کا کہنا تھا کہ مرالہ بیراج سے نکلنے والی بی آر بی نہر ملکی دفاع کے لئے بہت اہم ہے، بھارت نے چناب پر ایک درجن سے سے زائد مزید بجلی گھر لگانے کا منصوبہ تیار کر لیا ہے جس سے اس کو دفاعی نہر خشک کرنے کی صلاحیت مل سکتی ہے۔ کمشنر سندھ طاس نے کہا کہ آبی قلت کے باعث ملکی وسائل کو ذمے داری سے استعمال کرنا بھی ضروری ہے۔ ان کا کہنا تھا کہ سندھی انجینئرز آف دی ریکارڈ گفتگو میں کالا باغ ڈیم کو سندھ کے خلاف قرار نہیں دیتے لیکن سیاسی وجوہات کی بناء پر خاموشی ان کی مجبوری ہے۔سیمینار سے دیگر ماہرین نے بھی خطاب کیا۔