قومی مفادات کو ہر صورت مقدم رکھا جائیگا، صدر

اسلام آباد: صدر آصف زرداری نے کہا ہے کہ پاکستان خطے میں امن چاہتا ہے لیکن قومی مفادات کو ہر صورت مقدم رکھا جائے گا۔ صدر نے سال دو ہزار گیارہ تک پاک چین باہمی تجارت پندرہ ارب ڈالر تک لانے پر زور دیا۔ وزیر خارجہ شاہ محمود قریشی نے ایوان صدر میں صدر آصف زرداری کو خارجہ پالیسی کے مختلف پہلوؤں پر بریفنگ دی۔ پاک بھارت خارجہ سیکریٹریوں کی ملاقات، پاک افغان تعلقات اور امریکا کے ساتھ معاشی و دفاعی تعاون کے امور سر فہرست رہے۔ صدر نے کہا کہ پاکستان خطے میں امن کا خواہاں ہے لیکن قومی مفادات پر کوئی سمجھوتہ نہیں کیا جائیگا، چین کے خارجہ پالیسی انسٹیٹیوٹ کے نائب صدر کیا جن باؤ کی قیادت میں چین کے وفد سے بات چیت کرتے ہوئے صدر نے کہا کہ پاکستان اور چین کے درمیان باہمی تجارت کو مزید فروغ دینے کی ضرورت ہے۔