موسم بہار،پولن کی مقدار میں اضافہ

اسلام آباد: موسم بہار کی آمد کے ساتھ ہی وفاقی دارالحکومت اسلام آباد میں پولن کی مقدار میں خطرناک حد تک اضافہ ہو گیا۔محکمہ موسمیات کے مطابق مارچ کا مہینہ شروع ہوتے ہی اسلام آباد میں پولن کی مقدار بڑھنے سے الرجی اور سانس کی بیماریوں میں اضافہ ہو گیا ہے۔ وفاقی دارالحکومت میں اس وقت جنگلی شہتوت اور گھاس سے پیدا ہونے والے پولن کی مقدار خطرناک درجے تک پہنچ گئی ہے جبکہ چیڑھ اور بھنگ سے الرجی کی شرح درمیانے درجے تک ہے۔ محکمہ موسمیات کا کہنا ہے کہ رواں ہفتے الرجی کی شرح میں مزید اضافے کا امکان ہے۔ اْدھر اسپتالوں میں پولن الرجی کے مریضوں کی تعداد میں اضافہ ہونا شروع ہو گیا ہے۔ طبی ماہرین کا کہنا ہے کہ پولن الرجی کا شکار افراد اس موسم میں احتیاتی تدابیر اختیار کریں اور منہ کو ڈھانپ کر رکھیں۔