سرحد حکومت سےعلیحدگی کافیصلہ نہیں کیا، شباب

پشاور:  سرحد کے وزیر ایکسائز و ٹیکسیشن لیاقت شباب نے کہا ہے کہ صوبائی حکومت سے علیحدگی کا کوئی فیصلہ نہیں کیا گیا۔ آج نیوز سے گفتگو میں لیاقت شباب نے صوبائی حکومت سے علیحدگی اور استعفوں کے بارے میں اکتیس مارچ کی ڈیڈلائن سے لاتعلقی ظاہر کی۔ انہوں نے کہا کہ پیپلز پارٹی نے صوبائی حکومت سے علیحدگی اور وزارتوں سے استعفیٰ دینے کا کوئی فیصلہ نہیں کیا۔ لیاقت شباب نے کہا کہ ضرورت پڑنے پر حکومت سے علیحدگی اور استعفوں کا فیصلہ پارٹی کے شریک چیئرمین کریں گے۔ ان کا دعویٰ تھا کہ پیپلز پارٹی اور اے این پی کے درمیان معاملات بہترین انداز میں چل رہے ہیں۔ گورنر سرحد کی تبدیلی پیپلز پارٹی کا مطالبہ ہے۔ دوسری جانب صوبہ سرحد کے سینئر وزیر رحیم داد خان نے ڈیڈ لائن دینے کو پارٹی ڈسپلن کی خلاف ورزی قرار دیا ہے۔ سرحد اسمبلی میں پیپلز پارٹی کے پارلیمانی لیڈر عبدل اکبر نے مخلوط حکومت میں نظر انداز کئے جانے پر وزیر اعظم سے ملاقات کی تھی اور مطالبات کی منظوری کیلئے اکتیس مارچ کی ڈیڈلائن دی تھی۔