لاہور دھماکا: ہلاکتیں پندرہ ہوگئیں

لاہور: ماڈل ٹاؤن میں دھماکے سے تباہ ہونے والی عمارت کے ملبے سے ایک اور لاش ملی ہے جس سے جاں بحق افراد کی تعداد پندرہ ہوگئی۔ پولیس نے مبینہ خود کش حملہ آورکے سر کے اجزاء ڈی این اے ٹیسٹ کیلئے بھجوا دیئے ہیں۔دوسری جانب ماڈل ٹاوٴن ریزیڈنٹس ایسوسی ایشن لاہور نے بم دھماکے سے ہونے والے جانی اور مالی نقصان کا ذمہ دار حکومت پنجاب کو ٹھہراتے ہوئے اعلان کیا ہے کہ علاقے میں موجود مزید گیارہ حساس دفاتر کو سات روز کے اندر منتقل نہ کیا گیا تو احتجاجی تحریک شروع کر دی جائے گی۔ لاہور میں ایسوسی ایشن کے صدر عامر اعظم نے دیگر عہدیداروں کے ساتھ پریس کانفرنس سے خطاب کرتے ہوئے کہا کہ بم دھماکے کا ٹارگٹ بننے والے دفتر سمیت تمام ایسے دفاتر کے خلاف متعدد بار احتجاج کیا گیا لیکن حکومت نے کوئی توجہ نہیں دی۔ انہوں نے چیف جسٹس سے مطالبہ کیا کہ وہ رہائشی علاقے میں حساس دفاتر کے غیر قانونی قیام کا نوٹس لیں اور حکومت پنجاب متاثرہ مکینوں کا پچہتر کروڑ روپے کا نقصان پورا کرے۔ ایسوسی ایشن کے عہدیداروں نے مطالبہ کیا کہ حساس دفاتر کے قریب رہنے والے مکینوں کو سیکورٹی فراہم کی جائے۔ اگر سات روز کے اندر غیر قانونی طور پر قائم حساس دفاتر علاقے سے منتقل نہ ہوئے تو حکومت کے خلاف مظاہرے کئے جائیں گے۔