گوجرانوالہ: اشتہاری گروہ کا سرغنہ ہلاک

گوجرانوالہ:  اغوا برائے تاوان، قتل اور بھتہ وصولی کی سینکڑوں وارداتوں میں ملوث اشتہاری گروہ کا سرغنہ ساتھی سمیت پولیس مقابلے میں ہلاک ہوگیا۔ جاں بحق ہونیوالے کانسٹیبل کو سپردخاک کردیا گیا۔ اشتہاری ملزموں آصف عرف وڈو اور اس کے ساتھی ہاشم عرف کالا گجر نے پنجاب بھر میں صنعتکاروں، تاجروں اور سول افسران کو تاوان کیلئے اغوا کیا اور متعدد کو پیسے نہ ملنے پر قتل کردیا حکومت پنجاب نے ان کے سروں کی قیمت بیس اور دس لاکھ روپے مقرر کی تھی۔ کالا گجر صنعتکاروں اور تاجروں کو ٹیلی فونز کالز پر دھمکیاں دے کر کروڑوں روپے بھتہ وصول کرتا تھا۔ آصف وڈو نے پولیس کے ساتھ مختلف مقابلوں میں آٹھ پولیس اہلکاروں کو شہید کیا۔ گزشتہ روز جہانیاں میں گوجرانوالہ پولیس کے ساتھ مقابلے میں آصف اور ہاشم انجام کو پہنچ گئے۔ اشتہاریوں کی ہلاکت کے بعد شہریوں نے جوش وخروش کا اظہار کیا۔ ملزمان کے خوف سے متعدد کاروباری شخصیات ملک سے باہر منتقل ہوگئی تھیں۔ مقابلے میں شہید ہونے والے کانسٹیبل یاسین بٹ کو اسکے آبائی گاؤں میں سپرد خاک کیا گیا۔ خطرناک ملزمان کی ہلاکت کے بعد شہریوں نے وقتی طور پر سکھ کا سانس لیا ہے، لیکن انکا کہنا ہے کہ پولیس جرائم پیشہ افراد کے خلاف مہم جاری رکھے۔