کراچی امن جرگے کے زیر اہتمام امن کانفرنس

کراچی: کراچی امن جرگے نے شہر میں لسانی فساد کی سازش کرنے والوں کے خلاف کارروائی اور حالیہ فسادات کے متاثرین کو معاوضے کا مطالبہ کردیا۔ اورنگی ٹاؤن میں کراچی امن جرگے کے زیر اہتمام امن کانفرنس میں سیاسی، مذہبی و سماجی تنظیموں کے نمائندوں اور قومیتوں کے عمائدین نے شرکت کی۔ کانفرنس کی صدارت سابق ناظم کراچی نعمت اللہ خان نے کی۔ مقررین نے کہا کہ کراچی کی ترقی کے لئے امن ضروری ہے۔ ملک نازک دور سے گزر رہا ہے زبان و نسل کے تعصب سے بالاتر ہوکر حب الوطنی کا مظاہرہ کرنا چاہئے۔ انہوں نے زور دیا کہ سیاسی و سماجی تنظیمیں خود احتسابی اختیار کریں۔ حکومت سے مطالبہ کیا گیا کہ کراچی کے حالیہ فسادات کے متاثرین کو معاوضہ ادا کیا جائے۔ اسٹریٹ کرائمز اور ٹارگٹ کلنگ کی روک تھام کے لئے موثر اقدامات کئے جائیں۔ بڑھتے ہوئے حادثات کے پیش نظر سائٹ اور لانڈھی کے سوشل سیکورٹی اسپتالوں میں شعبہ حادثات قائم کئے جائیں اور کمیونٹی پولیس ختم کی جائے۔ شرکاء نے فلسطین پر اسرائیلی بمباری اور بھار ت کی دھمکی آمیز بیانات کی مذمت کی اور اس عزم کا اظہار کیا کہ ملک کے دفاع میں کسی قربانی سے دریغ نہیں کیا جائے گا۔