وزیراعظم نےزلفی بخاری کا نام ای سی ایل سے نکالنےپررپورٹ طلب کرلی

فائل فوٹو

فائل فوٹو

اسلام آباد:نگراں وزیراعظم ناصر الملک نے زلفی بخاری کا نام ای سی ایل سے نکالے جانے پر رپورٹ طلب کرلی ۔

ذرائع کے مطابق،عمران خان کے قریبی دوست زلفی بخاری پاکستانی نژاد برطانوی شہری ہیں اور ان کا نام  ای سی ایل میں شامل ہے،زلفی بخاری 2روز قبل عمران خان کے ہمراہ نور خان ایئر بیس سے عمرے کی ادائیگی کیلئے جانا چاہتے تھے لیکن ایف آئی اے حکام نےزلفی بخاری کو روک دیا تھا۔

وزارت داخلہ کے اعلیٰ حکام نے مبینہ دباؤ پر زلفی بخاری کو سفر کی اجازت دے دی تھی،معاملہ میڈیا میں آنے پر نگراں وزیر اعظم جسٹس (ر) ناصر الملک نے وزارت داخلہ سے زلفی بخاری کے سعودی عرب جانےکی رپورٹ طلب کرلی۔

دوسری جانب ایف آئی اے ذرائع کا کہنا ہے کہ زلفی بخاری کا نام بلیک لسٹ میں شامل ہے، زلفی بخاری کو ان کا نام ای سی ایل میں ہونے سے آگاہ کر دیا گیا تھا اور انہیں کہا گیا تھا کہ وہ ایئرپورٹ نہ آئیں، زلفی بخاری کو سفر سے روکنے پر ایف آئی اے حکام پر دباؤڈالاگیا۔

 ایف آئی اے حکام کو زلفی بخاری سے وطن واپسی کا بیان حلفی لینے کا کہا گیا، ایف آئی اے حکام کے انکار پر وزارت داخلہ سے رابطہ کیا گیا، وزارت داخلہ نے انہیں 6 دن کیلئے سعودی عرب جانے کی تحریری اجازت دی۔

loading...
loading...