شمالی وزیرستان میں آپریشن میں تاخیر ہو رہی ہے، گیٹس

قندھار: امریکی وزیر دفاع رابرٹ گیٹس نے کہا ہے سیلاب کی تباہ کاریوں کے باعث شمالی وزیرستان میں شدت پسندوں کے خلاف پاک فوج کے آپریشن میں تاخیر ہو رہی ہے۔دورہ افغانستان کے دوران قندھار میں گفتگو کرتے ہوئے امریکی وزیر دفاع نے الزام لگایا کہ پاکستان میں شرپسندوں کے محفوظ ٹھکانے افغانستان کیلئے بڑا خطرہ ہیں۔ ان ٹھکانوں کے خاتمے کیلئے پاک فوج اور نیٹو کے درمیان تعاون کو فروغ دینا ہوگا۔ رابرٹ گیٹس کا کہنا تھا کہ پاک فوج اور نیٹو اتحادی فوج کے درمیان تعاون میں بہتری آئی ہے جسے آگے بڑھانا ہوگا۔ خطے کی سلامتی کیلئے ضروری ہے کہ پاکستان، افغانستان اور نیٹو مل کر دشمنوں کے خلاف کارروائی کریں۔ امریکی فوجیوں سے گفتگو میں انہوں نے واضح کیا کہ افغانستان میں طالبان کے خلاف آئندہ دنوں میں مزید مشکلات کا سامنا کرنا ہوگا۔