اسرائیل، فلسطین مذاکرات جاری رکھنے پر آمادہ

واشنگٹن: اسرائیل اور فلسطین کے رہنماؤں نے ایک بار پھر مذاکرات جاری رکھنے اور ہر دو ہفتے بعد ملاقات پر اتفاق کیا ہے۔ اسرائیل کے وزیر اعظم نیتن یاہو اور فلسطین کے صدر محمود عباس کی واشنگٹن میں ملاقات ہوئی۔ بیس ماہ میں دونوں رہنماؤں کی یہ پہلی ملاقات تھی۔ امریکی وزیر خارجہ ہلری کلنٹن نے مذاکرات کے اس دور میں میزبانی کے فرائض انجام دئے۔ مشرق وسطٰی کے لئے امریکی ایلچی جارج مچل نے بتایا ہے دونوں رہنماوٴں کی ملاقات مفید رہی۔ محمود عباس اور نیتن یاہو کی آئندہ ملاقات چودہ اور پندرہ ستمبر کو ہوگی۔ دونوں رہنما ہر دو ہفتے بعد ملاقات کریں گے۔ جارج مچل نے بتایا کہ امریکا ایک سال میں اہم مسائل کے حل کا خواہاں ہے۔ فلسطین کے صدر محمود عباس نے غزہ کا محاصرہ ختم اور یہودیوں کی آباد کاری روکنے کا مطالبہ کیا ہے لیکن اسرائیل کے وزیر اعظم نیتن یاہو اس پر آمادہ نہیں۔