ہیٹی :بارش سے زلزلہ متاثرین کی مشکلات میں اضافہ

پورٹ ا و پرنس : ہیٹی کے زلزلہ متاثرین کی مشکلات کا سلسلہ ابھی ختم نہیں ہوا۔ رات بھر جاری رہنے والی بارش نے بے گھروں اور خیمپوں میں موجود افراد کو ٹھٹھرنے پر مجبور کردیا۔شدید بارش سے ہر طرف کیچڑ پھیل گئی ہے اور پینے کے لئے ذخیرہ کیا گیا پانی آلودہ ہوگیا ہے۔ عارضی کیمپوں میں رہنے والوں کا کہنا ہے کہ شدید بارش کے باعث وہ ایک لمحہ کے لئے بھی آرام نہیں کرسکے۔ رات بھر یہ خوف ان کے دل میں رہا کہ کہیں تیز بارش انہیں کسی اور مصیبت میں مبتلا نہ کردے۔ ہیٹی میں بارہ جنوری کو آنے والے ہولناک زلزلے سے دو لاکھ سے زائد افراد ہلاک ہوچکے ہیں۔ دس لاکھ سے زائد بے گھر ہوئے. جو خیموں اور عارضی پناہ گاہوں میں رہنے پر مجبور ہیں۔ ملک بھر میں مزید بارشوں کی پیش گوئی کی گئی ہے۔