سابق امریکی جنرل کا بیان ہتک آمیز ہے ،ہالینڈ

آرمسٹرڈیم : ہالینڈ نے اپنی فوج کے بارے میں ریٹائرڈ امریکی جنرل کا بیان ہتک آمیز اور ناقابل قبول قرار دے دیا۔ہالینڈ کے وزیر اعظم نے جنرل جوہن شیہان کے بیان کی مذمت کی ہے۔ امریکی سینٹ کی آرمڈ سروسز کمیٹی کے اجلاس میں ریٹائرڈ امریکی جنرل جوہن شیہان نے کہا تھا کہ ہالینڈ کی فوج میں شامل ہم جنس پرستوں کی وجہ سے انیس سو پچانوے میں آٹھ ہزار مسلمانوں کا قتل عام ہوا۔ ہالینڈ کے ہم جنس پرست فوجیوں میں لڑنے کی صلاحیت نہیں تھی جس کے باعث سرب فوج نے انہیں ٹیلی فون کے کھمبوں سے باندھ دیا اور ان کے سامنے مسلمانوں کا خون بہاتے رہے۔ جنرل شیہان نے امریکی فوج میں ہم جنس پرستوں کی شمولیت کی مخالفت کی تھی۔ انہوں نے یورپ کی مثال دیتے ہوئے کہا تھا کہ یورپی ممالک کو جنگ کا خطرہ نہیں ہے جس کے باعث ان کے ہم جنس پرست فوجی عسکری کے بجائے سماجی معاملات میں زیادہ دلچسپی لیتے ہیں۔