حماس کااسرائیل سے مذاکرات معطل کرنیکا مطالبہ

بیت المقدس: حماس نے بین الاقوامی برادری سے اسرائیل کے ساتھ مذاکرات معطل کرنے کا مطالبہ کر دیا۔ حماس کے رہنما خالد مشعل نے شام میں میڈیا سے بات کرتے ہوئے فلسطینیوں، عرب اور دنیا بھر کے مسلمانوں سے مقبوضہ بیت المقدس، مسجد اقصی اور مسلمانوں اور عیسائیوں کے مقدس مقامات کو بچانے کے لئے جدوجہد کی اپیل کی ہے۔ انھوں نے اسرائیل سے ہر قسم کے مذاکرات ختم کرنے کا مطالبہ کرتے ہوئے کہا کہ دشمن اپنے جرائم کو چھپانے کی کوشش اور فلسطینی علاقوں میں مزید یہودی بستیوں کی تعمیر کر رہا ہے۔ اس موقع پر پاپولر فرنٹ آف لبریشن فلسطین کے رہنما احمد جبریل نے فلسطینی صدر محمود عباس کی حکومت سے ہر قسم کا رابطہ ختم کرنے کا مطالبہ کیا۔ انھوں نے کہا کہ محمود عباس نے اٹھارہ سال میں فلسطینیوں کیلئے کچھہ نہیں کیا اس لیئے فلسطین کی تمام قوتوں کو محمود عباس کی حکومت کے خلاف اٹھ کھڑا ہونا چاہیے۔