پاکستان میں کرائے کے جاسوسوں کا انکشاف

نیویارک: امریکی اخبار نے انکشاف کیا ہے کہ پینٹاگون پاکستان اور افغانستان میں عسکریت پسندوں کے خلاف کرائے کے جاسوس اور قاتل استعمال کررہا ہے ۔نیو یارک ٹائمز کی رپورٹ کے مطابق امریکی وزارت دفاع کے افسر مائیکل ڈی فرلانگ نے ریٹائرڈ اسپیشل فورسز پر مشتمل نجی انٹیلی جنس کمپنی کی خدمات کرائے پر حاصل کر رکھی ہیں۔ اسپیشل فورسز میں شامل اہلکاروں کا بطور سرکاری جاسوس ریکارڈ موجود نہیں اور نہ ہی ان کے خلاف قانونی چارہ جوئی کا کوئی نظام وضع کیا گیا ہے۔ رپورٹ کے مطابق مائیکل فرلانگ نے اس منصوبے پر سرکاری پروگرام سے ہٹ کر فنڈز استعمال کئے اور پینٹاگون کے مطابق پاکستان و افغانستان میں کرائے کے جاسوسوں کا غیر قانونی استعمال سنگین الزامات کو جنم دے رہا ہے اور امریکی وزارت دفاع اس صورتحال کا از سر نو جائزہ پر مجبور ہو سکتی ہے۔ مائیکل فرلانگ امریکی فضائیہ کے ریٹائرڈ آفیسر ہیں۔ نیو یارک ٹائمز کی رپورٹ کے مطابق کرائے کے جاسوس رابرٹ پیلٹن نے کہا ہے کہ فرلانگ پروگرام کے تحت جاسوسوں کی فراہم کردہ معلومات پاکستان میں لوگوں کو قتل کرنے کیلئے استعمال کی جاتی رہی ہیں۔اس انکشاف نے وزیر داخلہ رحمان ملک کے دعوؤں کی ایک بار پھر تردید کردی ہے کہ پاکستان میں کرائے کے جاسوس اور قاتل موجود نہیں ہیں۔